TUBAAN FESTIVAL
Ang bayan ng Torrijos ay kilala
sa “TUBA”, isang uri ng lokal na alak na nagmumula sa mga umuusbong na bulaklak
ng puno ng niyog. Ang bulaklak na ito ay tinatalian at saka pinupungusan upang
tumulo ang katas sa nakasahod na tukil.
Ang katas o dagta mula sa mga bulaklak ng niyog ay natural na alak at
ito ay nilalagyan ng pinulbos na balat ng tangal upang matanggal ang medyo
mapaklang lasa. Ang tuba ay hindi lamang nagsisilbing alak, ito rin ay
ginagawang suka at ang pawis ng tuba kapag nagdadaan na sa isang proseso ay
siya ring nagiging lambanog, Ngunit, dahilan sa pagsulong ng teknolohiya at
pagsubok mula sa mga natural na kalamidad, naapektuhan ang industriya ng tuba
sa lalawigan. Kaya, naging layunin ng
bayan ng Torrijos sa pamamagitan ng kanilang Tubaan Festival na mapanauli ang
industriya ng pagtutuba. Malaki ang
naitutulong ng pagtutuba sa kabuhayan, gayundin mas mabuti ito sa kalusugan
kaysa sa mga inumin ngayon na pulos kemikal.
Para sa mga taga-Torrijos, ang pagtutuba ay isang kasanayan at kakayahan
na maihahalintulad sa isang sayaw. Ang maling hakbang sa pal-am ng niyog ay
maaaring ikabali ng buto o kaya’y ikahulog mula sa puno. May ritmo ang galaw,
may indayog at balanse ng katawan, at may pag-iingat at higpit ng yakap sa puno
upang matiyak ang kaligtasan kapag
nangunguha ng tuba.
No comments:
Post a Comment